دەقی نامەکە بە ڕێنووسی نوێ

لە شەوی ٣/٤ی٨ مەفرەزەیەکمان لە لقی شەھید مەلا قادر بە کارێکی تایبەت چوونە ناو شاری هەڵەبجە و لە وێ کەوتنە کەمینی جاشەکانەوە و بۆ ماوەی دوو کاتژمێر شەڕ و ڕووبەڕووبوونەوە لە نێوانیاندا ڕوویدا و لە ئەنجامدا جاشەکان شکان و چوونەوە بۆ تەویلەکانی خۆیان و مەفرەزەکەمان بە سەلامەتی گەڕایەوە. ھەروەھا شەوی ٤/٥ی٨ کۆمەڵێک لە چڵکاوخۆرەکان بە نیازی تاڵان کردن ھاتن بۆ گوندی عسف، بەڵام پێشمەرگە قارەمانەکانمان لە ھێزی ھەڵگورد و لقی شەھید حوسێن عارف لێیان ڕاپەڕین و شەڕ لە کاتژمێر ١١ی شەو دەستی پێکرد و هەتا کاتژمێر ١ی شەو درێژەی کێشا و لە ئەنجامدا دوژمن بە سەر شۆڕی و تێکشکاوییەوە ڕایانکرد و پێشمەرگەکانمان بە سەربەرزی و بەبێ زیان گەڕانەوە و دواتر لە زیانەکانی دوژمن ئاگادارتان دەکەینەوە. ئیتر بۆ پێشەوە بە سەرۆکایەتیی بارزانى مستەفا.